羅馬鬥祖雲達斯焦點所在,必數意大利兩代金童托迪及迪比亞路交鋒,兩位十號仔叱咤意國球壇十多年,係好多意甲fans嘅集體回憶。可惜兩人都難敵歲月摧殘,同樣英雄遲暮,兩軍今仗對壘,或會成為呢兩位傳奇球星,最後一次同場競技,各位球迷萬勿錯過。
現年卅五歲嘅「羅馬王子」托迪,自九二年出道後,就成為羅馬孭飛人物,即使上季都仍係球隊首席射手,但今季傷患纏身,新老闆迪賓尼迪圖及新帥安歷基都銳意改革球隊,令托迪失勢。不過,羅馬今季成績慘淡,而且托迪已經傷愈,並喺操練時表現出良好狀態,加上保贊停賽,安歷基惟有向現實低頭,今場會派遣托迪正選上陣,寄望呢位老臣救亡。
珍惜祖記每分鐘比賽
至於比托迪大兩歲嘅迪比亞路,更已被祖記放棄,冇得續約。換言之今季結束後,「老金童」一係轉投其他球隊,一係退休。迪比亞路早前更當黑,對切塞納時被踢傷頭部入院,但閃電復出,並喺上周中意大利盃踢足一百二十分鐘。迪比亞路仍不言倦,渴望今場再披甲,要珍惜喺祖雲達斯嘅餘下每一分鐘比賽時間,今仗實行同托迪炮製不朽經典