英超「燒錢戰爭」今晚上演，車路士今晚喺主場對曼城，讓平半追唔過。講燒錢，以往冇人鬥得過「億萬大軍」車仔，可惜老細阿布近年縮皮簽唔夠人，今場大衞雷斯停賽隨時出事，相反「金錢帝國」曼城人多勢眾，領隊文仙尼仲發出奪冠宣言，受讓抵捧！（有線200及300、廣東體育周二凌晨4:00直播）
連續以3:0比數打沉紐卡素同華倫西亞，令人覺得車仔開始擺脫低潮，但實情係，車路士大把更衣室問題未解決，例如林柏特嘅必然正選中場位置被新仔奧里奧爾羅美奧搶走，條氣肯定唔順。前鋒安歷卡同中堅阿歷士洛里高更加因為被剔出一隊名單嬲到爆，到底有邊個真正歸順領隊保亞斯，佢自己都未必知。
車仔大衞雷斯坐波監
近年車仔削減軍費，可能係呢場波嘅失分關鍵，事關費蘭度托利斯呢排再入雪櫃，意味33歲射手杜奧巴要連續3場打正選，賽程頻密入唔到波唔奇。至於大衞雷斯停賽，原本應該由阿歷士洛里高頂上打中堅，弊在佢同保亞 斯擘面，估計車仔要將伊雲洛域移入中路，再用剛啱傷愈嘅保辛華打右閘，怕未？
曼城立志搶分過聖誕
雖然曼城都有右閘米卡李察士未好番，不過薩巴列達、高路托尼甚至奧奴夏都能夠頂上，根本唔需要擔心，而且曼城已經打算1月再買人，領隊文仙尼仲話，假如曼城捱過聖誕新年快車賽程，1月後能夠保住榜首位置，聯賽冠軍就係囊中物，咁講法呢場梗係要繼續搶分打底啦！
橫數千軍
車仔旺開入球單
‧對上7場有6次開入球單。
‧前鋒杜奧巴已連續2場開首名入球。
曼城半場14戰不敗
‧今季英超得12勝2和不敗。
‧近14場未試過半場落後，7次領先、7次打和。
