挪超買咩好?莫迪今晚喺主場對史達比克,要追1.57倍入球大,因為莫迪傷兵問題未解決,中場莫史特朗、後衞史坦同史甸斯列特仲養緊傷,新教練蘇斯克查根本諗唔到辦法止血,開季3場狂失7球嘅場面,隨時再重現。(開賽時間:周一凌晨0:00)
同史達比克交手多波入
蘇斯克查球員時代形象勁好,即使唔係曼聯球迷,一樣會欣賞佢嘅超級射術同專業態度,不過前鋒出身嘅佢,轉做教頭似乎唔多掂,佢執教嘅莫迪開季至今得2和1負,防線穿晒窿,成隊波有前冇後,連續3場開入球大。再睇埋雙方往績,近5次聯賽碰頭有4次開入球大,今場好有機會再開入球騷,1.57倍「大」咪嫌熱。