車路士在歐聯成功晉級，保亞斯總算暫保帥位，佢賽前就話今場聯賽大戰，重要性唔比上周中歐聯低，若然有咩差池，車仔重奪英超美夢好可能就此粉碎。
保亞斯賽前表示，車仔現時已被榜首曼城拋開十分，今場對賽會係「藍戰士」縮窄距離嘅良機，只要贏波就仲有機會衝冠，相反輸波嘅話，差距就會增至十三分，要超前對手奪冠唔係冇可能，但就渺茫啲囉！不過保亞斯續指，球隊近兩仗已全面復甦，好有信心能乘勇擊敗曼城，證明車仔並非「遇強必輸」。
反擊加利仔批評
另方面，保亞斯亦向退休後到處辣火頭嘅加利尼維利進行大反擊。加利仔早前批評車路士唔團結，又話大衞雷斯唔集中經常累輸波。保亞斯受訪時就反擊，話加利仔根本對車路士內部一無所知，冇資格批評車路士更衣室內嘅問題，保帥更寸佢連車路士更衣室點去都唔知添
