日前歐聯賽事有場冷門戰果，曼聯主場對住巴素利竟然贏唔到，搞到好多上盤客焦頭爛額，老老實實，「紅魔鬼」呢類超級勁旅出線絕對唔成問題，根本唔會場場同你去盡，讓到兩球咁誇張，絕對唔抵玩，嚟緊都要小心。
講番今次重心推介，歐霸盃馬里博爾主場對伯明翰，捧主隊！兩隊波拍埋一齊，大家肯定對伯明翰較為熟悉，不過，自從老細有事後，呢班波前景唔明朗，隊內氣氛好極有限，佢哋現時人腳一般，踢英冠都唔算特別好，出到歐洲賽完全唔夠班，千祈唔好睇得太高。馬里博爾係斯洛文尼亞頂級勁旅，論實力絕對唔曳得過伯明翰，佢哋主場惡到暈，今次有望贏波贏盤。
火車頭飛數似樣
同日莫斯科火車頭主場對安德列治，都係要主隊！俄羅斯球隊向來靠主場搵食，莫斯科火車頭亦唔例外，佢哋近期表現好，而且本身水平高，今次對住安德列治讓到半球至半一，盤口硬淨到不得了，飛數似樣，上盤有計。
