冇人可以保證，付出同收穫一定成正比，正如拉素教練利查做完救世主，落難後一樣會被狂迷死亡恐嚇，據講佢已心灰主動辭職，只不過新教練未到唔走得住。今晚弗到爆嘅士砵亭喺歐霸盃分組賽D組主場對拉素，應該可以趁對方軍心插水袋足3分，1.83倍主W抵追。（有線63及203周五凌晨3:05直播）
前季要護級嘅拉素，上季喺利查執教下踢出尊嚴，最後以第5名拎到歐霸盃入場券，球迷當然錫晒佢啦。點知今季拉素戰績差些少，部分狂迷就反面唔認人，上兩個星期拉素主場以1:2不敵熱拿亞，利查竟然被擁躉狂噓，據講賽後佢呆晒，搵埋主席洛迪圖去更衣室，當住球員面作出請辭。
拉素教頭收死亡恐嚇
由於洛迪圖對利查極度信任，所以當時冇接受佢嘅辭職，不過近日洛迪圖大爆，曾經有狂迷喺街上向利查作死亡恐嚇，意大利傳媒認為，利查冇可能唔走，只要拉素搵到新教練，佢就會即閃。一位受擁戴嘅有料教頭走人，你話班球員仲有乜士氣先？睇埋佢哋個傷兵名單，中場莫利、艾華路干沙利斯同布洛治養傷，另一位中場指揮官沙利又話要坐波監，陣容不整士氣曳，真係要唔過。
士砵亭雲高連續4場入波
對家士砵亭就唔同啦，新教練杜明高斯上季帶領布拉加奪得歐霸盃亞軍，今季士砵亭撬佢返嚟，仲支持佢大換血，迪亞高卡普、安恩胡等球星來投，實力幾級跳，經過季初連和3場，近排終於發力，對上6戰有5勝1負，期間攻入15球，新加盟嘅烏德勒支射手雲禾夫斯雲高更連續4場入波，進入着火模式，杜明高斯帶隊踢歐霸盃咁掂，唔會咁輕易放過拉素。
歐霸盃D組
