忘記背後，努力面前！雖然馬體會上仗慘敗畀巴塞，但一班球員賽後都話已經諗緊今晚歐霸盃I組作客點樣對付雷恩，難得教練文沙奴派遣強陣出征，平手盤梗係捧馬體會！（有線61及201周五凌晨1:00直播）
由於些路迪臨時頂替錫永，令歐霸盃I組頓成死亡之組，不過馬體會首仗主場仍輕取些路迪2:0。雖然呢支西班牙勁旅啱啱喺西甲作客慘吞巴塞5隻光蛋，但一班球員賽後都話輸畀「地上最強」冇嘢好講，仲話已經將焦點轉放喺歐霸盃上，其中前鋒阿祖安盧比斯話：「我哋今晚作客雷恩會嘗試打出球隊嘅風格，希望全取3分。」
雷恩主場踢分組賽不勝
馬體會今次作客雷恩，教練文沙奴日前公布20人大軍，除咗前鋒伊度亞度沙維奧同後衞安東尼奧盧比斯因傷冇隨隊外，上屆歐霸盃神射手法卡奧、前祖雲達斯中場迪亞高、烏拉圭中堅高甸同正選門將泰拔高圖爾斯全部都喺名單上，極之有誠意。
雷恩今季喺法甲表現神勇，但喺歐霸盃首仗作客就以1:2不敵烏甸尼斯。翻查數據，原來雷恩史上喺歐霸盃（連歐協盃）分組賽階段，主場竟然一場都未贏過，再聽埋教練安東尼堤賽前突然承認明年暑假可能將中場重心馬維拿賣畀阿仙奴，你話今晚仲點捧得落手？
