今晚英冠上演「雙城記」，主場出擊嘅卡迪夫城迎戰狀態同樣唔差嘅李斯特城，兩班波今季目標都係爭升班，實力接近，呢場波都幾有睇頭㗎！
一睇卡城同李城近10次對賽各勝4場，就知呢兩隊波真係半斤八両。最近一次交手係早兩日嘅英格蘭聯賽盃，當時大家都派出咗唔少副選上陣，最後打成2:2，結果卡城射12碼晉級。今次返嚟聯賽交手，大家都用番正選打真軍，其中卡城仲有蘇格蘭射手堅尼米拿復出，由佢拍住安梳爾攻堅，火力唔講得笑。至於由名帥艾歷臣領軍嘅李城，近2季到訪卡城都係輸波而回，今鋪贏面點都低啲，捧卡迪夫城主勝
