正所謂寧買當頭起,新季大灑金錢擴軍嘅馬拉加,近排3連勝氣勢勁爆,今晚佢哋出訪實力平平嘅薩拉戈薩,力奇真係睇唔到主隊有乜反抗能力,1.88倍客W記得捧場。(now632及660台周一凌晨4:00直播)
薩拉戈薩3將打柴
有條大水喉射住嘅馬拉加,今夏買入咗包括雲尼斯達萊、祖亞昆、杜拿蘭同辛迪卡索拉等世界級球星,當中仲係當打嘅辛迪卡索拉,開季4場聯賽就入咗4球,真係唔講得笑。事實上,馬拉加自開咧戰1:2不敵西維爾後開始上力,近期3連勝入6球,而且仲係1球不失添,力奇好期待一旦雲佬爆發,拍住荷西朗頓同傷愈嘅巴迪斯達攻堅,威力肯定好勁。
薩拉戈薩上仗作客3:4不敵貝迪斯,係就係踢得唔錯,但咁都輸其實都好打擊士氣。佢哋今仗會有前鋒普斯迪加、伊度奧里奧爾同守將美拉缺陣,攻守都受到影響,以佢哋近4次主場對馬拉加只得1勝1和2負嚟睇,遇着對手仲要實力倍增,想唔輸都難啦