阿仙奴新季一開就遇上地獄賽程,今晚佢哋就要喺歐聯外圍賽迎戰烏甸尼斯,萬一失手入唔到分組賽,對心理同荷包嘅打擊都咪話唔大!可惜英超賽會都唔幫兵工廠,啱啱先鬥完紐卡素,嚟緊周六又要大戰利物浦,壓力巨大,班生牯仔未必頂得住,撐烏甸「讓球客勝」!(有線61、201及中央5台周三凌晨2:45直播)
法比加斯同拿斯尼兩大王牌嘅離隊風波,已經攪亂晒阿仙奴暑假增兵部署,雲格到依家只係簽得謝雲奴一個星級球員,阿歷士張伯倫同贊堅臣雖然係明日之星,但兩個都未夠20歲,應該好難即時提升兵工廠戰力。
一班小將新季一開就硬仗連場,實力、體力同心理上都係極嚴峻考驗,況且上場英超對紐卡素成班波毫無霸氣,中場無晒創造力,亦少咗以往嘅中路後上突入攻門,路斯基嘅狀態更加令人擔心,再加埋尹佩斯、拿斯尼同領隊雲格一齊停賽,真係慘情!
意甲未開咧烏甸無後顧之憂
兵工廠中前場其實人腳唔差,不過上季尾開始崩潰嘅防線就冇乜點執過,最可靠嘅中堅華美倫又帶傷在身,斟介菲臘積基爾卡、加利卡希爾、基斯杜化森巴都冇晒下文,呢條防線實在好難畀到球迷信心,今晚對住有上季意甲神射手迪拿達利壓陣嘅烏甸隨時又失波,入球大都玩得過㗎!
事實上烏甸嘅情況都唔係好得阿仙奴好多,三線核心阿歷斯山齊士、恩拿同沙柏達華倫西亞都被賣走,戰鬥力一定差過上季。好在意甲仲未開咧,烏甸可以全心部署踢呢場大戰,作客大踢最擅長嘅穩守突擊,博阿仙奴防線犯錯偷雞,要保住唔輸有力做到,如果可以偷到一兩個作客入波,下場回師主場就更易踢啦!