車仔攻極都攻唔入史篤城,心諗呢個星期英超唔係開晒下盤咁邪?之後仲要又見到迪基亞甩拖失波,嚇到我呢個曼迷心都涼咁截。好在最尾西布朗好客氣送球烏龍畀紅魔鬼,等我可以保持好心情迎接今晚歐聯外圍賽,心水係主場出戰嘅法國里昂,話晒佢哋連續十年踢入歐聯分組賽,冇理由今季先至斷纜啩?(有線62及202台周三凌晨2時45分直播)
里昂今月聯賽對手都係弱旅居多,令佢哋可以專心迎戰魯賓卡山,雖然啱啱累街坊打和阿些斯奧,但其實佢哋佔盡優勢,射極唔入只係冇運,今晚之戰係新教練加迪考牌作,肯定搏老命爭勝。
魯賓卡山鋒力曳
魯賓卡山今季表現失色,季初甩晒拖,依家喺俄超追極都只係第四位,佢哋最大問題係鋒力,兩位首席射手卡拉丹尼斯同諾保亞都係中場球員,雖然喺西班牙靴高斯搵到巴拉圭國腳希度華迪斯返嚟,但遠水不能救近火,以魯賓卡山近年喺歐聯分組賽嘅作客表現,今晚好牙煙咯!