連續3年失落蘇超嘅些路迪，今晚喺新季首輪賽事作客弱旅喜伯年，趁住對手今夏人腳變動大兼陣營傷兵纍纍，要大勝一場打響頭炮機會樂觀，就算讓波出擊，一於照捧1.85倍「讓球客勝」！（now638台周日晚7:30直播）
喜伯年傷兵多又唔弗
些路迪上季鬥到最後一輪先至輸畀宿敵格拉斯哥流浪，今季捲土重來爭標嘅決心當然毋庸置疑。雖然話佢哋今夏增兵唔見咩大球星加盟，最巴閉只係用咗100萬鎊買入個肯尼亞新星雲耶馬，但查實以佢哋原有班底，有森馬拉斯、寄誠庸同馬隆尼等人孭飛，喺蘇超面對流浪以外嘅球隊，根本綽綽有餘，即使今仗會有隊長史葛布朗停賽，都一樣冇有怕。
喜伯年呢邊，唔似得些路迪咁之前喺熱身賽3連勝砌低澳職同英冠球隊，佢哋就連對住蘇甲嘅福爾柯克同利雲斯頓都搞唔掂，認真失禮！難怪領隊哥連卡達活會承認，如果班波再唔增兵同提升表現，今季肯定達成唔到搶佔歐霸盃席位嘅目標。更大鑊嘅係，喜伯年今仗仲有中場馬田史葛、桑華殊、守將米高赫特同艾普蘇捷都因傷缺陣，殘陣出擊，主場都咪信佢哋呀！
