踢咗接近1個月,美洲盃今晚終於爆發終極「圭圭」決戰!雖則巴拉圭今屆符碌到痹,但上場對委內瑞拉元氣大傷,搞到領隊、助教兼主力都停賽,似乎運氣已用得七七八八,今晚對住有總統入場支持,兼有射手蘇亞雷斯孭飛嘅烏拉圭,朱楓覺得「烏圭」可以喺法定時間內勝出,開出2倍主W!(有線61、64、201及203、中央5台周一凌晨3:00直播)
巴拉圭喺今屆美洲盃真係超符碌,分組賽至今踢咗5場波,法定時間都未贏過,但最後都殺入決賽,真係極之罕見。領隊馬天奴仲因為連續喺世界盃同美洲盃兩屆大賽,帶領「巴圭」成績都好過巴西同阿根廷,被外界封為「巴拉圭莫連奴」添!
巴拉圭將帥停賽運氣盡
不過,巴拉圭上場4強以12碼淘汰委內瑞拉卻付出沉重代價,領隊馬天奴、助教保塔索同中場莊拿芬辛坦拿都領紅,今晚全部停賽,當中馬天奴仲要停兩場,射手辛達告魯斯亦喺比賽中受傷,極大機會缺陣,而且一班球員仲因為賽後同對方球員爆發衝突,被賽會罰1萬美元,似乎運氣差唔多用晒。
相比巴拉圭,烏拉圭今屆賽事漸入佳境,繼8強憑12碼淘汰阿根廷後,4強輕鬆以2:0輕取秘魯,當中射手蘇亞雷斯仲梅開二度,但呢位利物浦射手賽後話無意爭神射手,會以國家隊為重。不過最令烏拉圭球迷放心係,上場對秘魯受傷嘅中堅盧根奴證實冇事今場可以候命,射手卡雲尼亦可復出,中場迪亞高佩雷斯亦刑滿,加上烏拉圭總統穆希卡今晚又話會入場支持隊波,士氣大振,睇嚟「烏圭」今晚極大機會捧走美洲盃!
賽制
決賽以1場決勝負,若90分鐘賽和,會加時30分鐘,再和互射12碼決勝。
近5屆決賽戰果
年份 冠 軍 亞 軍 比數
07 巴 西 阿根廷 3:0
04 巴 西 阿根廷 2:2
(互射12碼贏4:2)
01 哥倫比亞 墨西哥 1:0
99 巴 西 烏拉圭 3:0
97 巴 西 玻利維亞 3:1
烏拉圭晉級之路
準決賽2:0贏秘魯
8強1:1和阿根廷,
(互射12碼贏5:4)
分組賽
1:0贏墨西哥
1:1和智利
1:1和秘魯
巴拉圭晉級之路
準決賽0:0和委內瑞拉,
(互射12碼贏5:3)
8強0:0和巴西,
(互射12碼贏2:0)
分組賽
3:3和委內瑞拉
2:2和巴西
0:0和厄瓜多爾
蘇亞雷斯射手榜領先
‧史上20次殺入美洲盃決賽,14次奪標。
‧蘇亞雷斯暫以3球與阿古路並列射手榜首位。
巴圭近仗食慣白果
‧史上7次殺入美洲盃決賽,2次奪標。
‧近5場賽事入5球失5球,但有3戰食白果。