加拿大聽朝喺金盃C組最後一戰只要擊敗篤定晉級嘅巴拿馬，即可確保出線資格，戰意遠高於對手，2.4倍主勝捧得過。（開賽時間：周三早上7:00）
加拿大贏波即出線
由於後衞迪贊積高域於開幕前一刻先唔踢得，確係攪亂加拿大嘅部署，結果揭幕戰淨吞美國2蛋，不過佢哋好快就成功調整，上場面對瓜德羅普順利贏波，保持出線機會。今場雖然打和亦都好有機會以最佳小組第3名晉級，但為免夜長夢多，加拿大今仗都係攞咗3分先至算。
對手巴拿馬上場居然爆冷擊敗美國兩戰全勝，不過話晒佢哋已經提早出線，大有機會留力8強大戰，連續兩場都入波嘅迪查達同基比爾高美斯，今戰好大機會被收起，實力要重新估計。事實上佢哋首兩輪分組賽都係領先之後失波，首仗更被踢少個嘅瓜德羅普連追兩球，可見防線唔多穩陣，球員專注力有問題，今次面對逐漸上力嘅加拿大更難保不失。
賽制
12支參賽隊伍分3組，每組4隊作賽，勝3分，和1分，負0分。每組前2名球隊，以及2支最佳小組第3名將進身8強淘汰賽事。
