周三凌晨U21歐國盃A組分組賽,主辦國丹麥U21鬥白俄羅斯U21。丹麥首戰倒灶不敵瑞士,但實際表現唔曳,主力基斯甸艾歷臣等都對辦;白俄上仗藉冰島打少個先贏波,而且主力尤真高已退隊,尼卡卓克同哥迪卓克亦上陣成疑,一於信多次主W。(周三凌晨2時45分開賽)
瑞士冰島「大」激鬥
丹麥首場對瑞士,最後意外輸○比一,累唔少捧場客損手爛腳。其實丹麥發揮唔曳,應屆荷甲最佳年輕球員基斯甸艾歷臣、邦比中場米克贊臣都表現不俗,丹麥輸波最大原因係怯場,相信第二仗會有明顯改善。雖然丹麥平均實力唔算特別標青,但今戰非勝不可,小將們得到現場球迷落力支持,應該可以打高兩皮波。
白俄上仗同冰島鬥得難分難解,最後冰島打少一個白俄先贏到兩粒。事實上,佢哋陣容不整入波欠板斧,今場信丹麥可贏波開齋。
同組另一場瑞士U21對冰島U21,瑞士攻力唔錯,上仗連史浩克04前鋒加雲洛域都未出亦打敗丹麥。冰島首戰輸兩粒,但莊家開瑞士W有2.15倍分頭,似乎瑞士可勝不穩。冰島外圍賽八戰入廿九球,形勢上今仗焗攻,轉捧大盤好過。(周三凌晨零時開賽)