東道主美國日前以1:2慘負巴拿馬，擁躉嘅忍耐力已接近極限，再衰嘅話，領隊巴特利可以話炒硬魷魚。美國聽朝喺美洲金盃C組分組賽終極戰撲擊瓜德羅普，想留力都唔得，相信巴特利會安排個似樣陣容出戰，1.43倍「讓球主勝」熱都要照追（now634台周三早上9:00直播）
原本巴特利嘅如意算盤係上場搞掂巴拿馬提早出線，呢場派副選敷衍瓜德羅普，點知強陣出戰，竟然都輸畀巴拿馬冇晒面。其實美國頭場小勝加拿大，主場球迷已經有開汽水聲，要求巴特利辭職，美國傳媒更加話，只要美國拎唔到金盃冠軍，巴特利就要走人，家陣輸畀巴拿馬，支持者肯定會更加落力「歡送」巴特利，如果美國再唔踢爭氣波，擁躉衝落場溶咗佢都似。
ｐ：瓜德羅普守將停賽
睇番陣容，美國今次絕對唔係玩玩吓，射手當路雲、中場丹普西、隊長捷雲度奴同門將侯活全部有入選，超班格局唔似會連衰兩場。
至於係法國屬地嘅瓜德羅普，對上兩屆都殺到入淘汰賽，前屆更係4強分子，可惜今屆神奇不再，先後不敵巴拿馬同加拿大，兩戰全敗瀕臨出局邊緣，而且連續兩場有球員領紅牌，今場又有後衞林保迪停賽，防線被迫執來執去，肯定唔係好事，要阻美國發達唔容易。
