英超今晚又上演「大」戰！保頓喺主場迎戰頹勢嘅阿仙奴，論實力「小兵」當然勝一籌，不過佢哋心理質素咁差，防守力又弱，對家保頓唔係善男信女，與其博兵工廠W，倒不如轉捧1.65倍「入球大」仲好啦！（有線201及301、廣東體育周日晚11:00直播）
有朋友同小妹講話家陣啲大球會集中晒喺倫敦，主因係倫敦生活多姿多采！咁又係，大球星搵得錢多，又邊能夠忍受悶蛋嘅生活吖？車路士能夠吸引咁多球星加盟，有錢同有實力當然重要，不過地理位置優勢亦唔可以忽視。
其實阿仙奴只要肯改變路線，由賺錢模式調整為有野心爭標，各地好手肯定爭住來投，重現兵工廠十年前嘅風采，相信呢個都係唔少「槍手」球迷嘅願望。不過願望還願望，阿仙奴呢排個勢堅頹，要頂住車路士都難，仲何況追曼聯？後防欠佳係鐵一般事實，門將位置大家都冇晒辦法，最好嗰個施捷斯尼又冇經驗，後衞無論係伊保爾、佐羅同哥斯尼，都冇一個係頂級球員！即使尹佩斯同法比加斯幾勁，前面入埋咪又係唔夠後防輸！
保頓史杜列治復出
對家保頓有前鋒史杜列治復出、後衞保羅羅賓遜儲夠10張黃牌停賽。保頓上星期足總盃吞史篤城5蛋出局，聯賽又唔上唔落，可列入「提早收咧」類別，今仗戰意難估，既然兩軍都爭唔落，撐阿仙奴1.65倍客W又冒險咗少少，玩入球大博兩軍鬥攻就最好啦！
開放時間：周日晚9:00至周一凌晨1:30
保頓旺開入球單
‧最近6場比賽全部開入球單。
‧史杜列治為保頓披甲8戰已攻入6球。
阿仙奴對賽佔優
‧最近8次對保頓贏晒。
‧尹佩斯連續6場英超作客賽事有波入。
