《是日正菜》推介日式料理，浦和紅鑽今日喺日職主場對名古屋鯨魚，屬於07年亞冠盃盟主對上季日職冠軍。雖然紅鑽近年戰績倒退，但為招呼倒戈出戰、今日30歲生日嘅田中鬪莉王，佢哋打出「打倒名古屋、打倒鬪莉王」旗號，擺明要圍捕鯨魚，讓平半要捧。（now633台及廣東體育周日下午1:00直播）
今季紅鑽由新教練施里高柏杜域帶領，簽入聖保羅前鋒馬祖拿同新潟天鵝中場馬斯奧李察士，點知開咧戰作客以0:1不敵神戶勝利船，認真嚇親街坊。不過咁，呢場紅鑽有射手田中達也傷愈候命，最近喺熱身賽又贏過山形山神3:0、打和廣島三箭2:2，狀態對辦，即使中場鈴木啟太坐波監都有本事翻身。
由於上季撞啱停賽，今次係田中鬪莉王轉會鯨魚後，首次重返紅鑽主場倒戈，由於佢轉會之後，曾經公開批評紅鑽陣容唔掂，得罪晒以前啲隊友，報道話紅鑽班球員咁決心想贏波，係要令呢個寸友嘅生日冇晒歡樂氣氛，加上新教練首戰領軍輸波，有理由相信，紅鑽今場會當正決賽踢，讓平半博得過。
對家方面，鯨魚因為要分心亞冠盃，備戰時間肯定唔夠紅鑽多，而且前鋒玉田圭司、中場貝辛奴域同丹尼臣哥度巴未好番，唔多夠人用，連場硬仗肯定比較蝕底，特別係玉田圭司養傷，逼到教練史杜高域要放棄433陣式，改派新仔永井謙佑同中鋒約舒亞堅尼地打雙箭頭，默契唔夠好容易累事。
