英冠球季入直路，護級同爭升班形勢一樣緊湊，今晚場「護級六分波」唐卡士打主場對水晶宮，捧主勝。水晶宮一向主強客弱，但上仗關鍵戰主場都不敵斯肯索普，士氣必大受打擊；今仗唐軍免費招待球迷入場打氣，可見贏波決心，主W過2倍好路！ （周五晚10時開賽）
睇番目前英冠聯賽榜，唐軍四十五分排尾五，水晶宮四十三分排尾四，其實尾三斯肯索普都有四十分，故兩隊護級毫不穩陣。唐軍本身冇咁頭痕，但近八聯賽只攞得三分，令處境愈來愈危險，高層已落柯打今仗一定要贏，更畀粉絲免費入場支持球隊，戰意有保證。水軍上仗大意失荊州全失三分，連續十三仗主場不敗佳績斷纜，肯定打窒條氣，而作客一直係水晶宮弱項，近六客戰僅取一分，如此劣績點可以唔捧主W？
另一場諾定咸森林主場對李斯特城，森林季尾後防不穩，近五仗失十三球，領隊比利戴維斯都冇晒計，相信短時間內都難以解決問題。李軍要爭前六作客冇保留，近三作客都同對手對攻開大而回，今仗續追。而斯肯索普作客高雲地利，雖然主隊近績佳，但佢哋始終冇嘢好爭，踢緊風流波，好難長時間表現穩定，相反斯軍為護級場場波都係決賽，作客有望成功搶分。
