荷甲錦標今季爭持激烈,暫與榜首燕豪芬叮噹馬頭嘅川迪,餘下3輪賽事絕冇失分空間,可惜佢哋近況明顯下滑,加上首席射手真高受傷,作客主場素來硬淨嘅海牙隨時失分,一於捧1.7倍「讓球主勝」。(now639台及廣東體育周六凌晨2:45直播)
川迪與燕豪芬同得65分,但就因得失球較差暫列第2位。話就話嚟到爭標直路,川迪唔可以有任何閃失,可惜班波近期戰績差強人意,連盃賽在內近4場竟只得2和2負不勝。雪上加霜嘅係,首席射手真高因為左肩受傷,今場極有可能唔出得,大大削弱入波本錢,作客出戰下存有暗湧。
另邊廂嘅海牙上輪作客輸咗畀阿爾克馬爾,3連勝走勢告終,不過,海牙主場出擊向來有一定保證,不敗率高達8成7,而近7場就錄得6勝1和不敗。更重要係佢哋火力相當驚人,暫以60球成為荷甲入波第3多嘅球隊,僅次於燕豪芬同阿積士。海牙今仗雖有中場保斯查特受傷打柴,但勝在整體實力平均,加上今季已入咗18球嘅箭頭布利堅又狀態不俗,為爭荷甲神射手必施展渾身解數,海牙受讓一球下值得捧場。