隨着歐聯出局,車路士餘下賽事唯一可爭就係聯賽亞軍,領隊安察洛堤同旗下嘅貴價球星,必須喺餘下賽事證明自己嘅實力,以免來季列入被清洗嘅名單,主W冇肉食,建議向車仔贏一比○及二比○波膽埋手。(有線203及303台周四凌晨2時45分直播)
車路士目前落後第二位嘅阿仙奴兩分,雖然聯賽亞軍只係虛名,但對一支億萬大軍嚟講,如果連亞軍都不保,實在好難向老細交代。臨近季尾不斷有車路士清洗名單傳出,一班主力好似杜奧巴、安歷卡同馬隆達都有份,所以嚟緊幾場車仔一定搏。
事實上,車仔本身質素高,目前又冇乜傷兵,冇歐洲賽任務,又冇心理包袱,真係搵唔到任何藉口再失分。
伯明翰早前護級水浸眼眉,但近三仗一口氣搶到七分後,護級壓力即時大減,伯明翰入球能力始終薄弱,今季十五場聯賽作客亦僅贏過兩場,以佢哋嘅攻力要威脅車仔大門確實非常困難,既然兩隊交手極旺細,近十次碰頭有八次開細盤,今場不如博車仔小勝嘅波膽好過!