當初李安納度接掌國米被視為救世主,偏偏呢位森巴型佬就愈教愈沉,歐聯出局、意甲嘅衞冕任務亦幾近幻滅,好衰唔衰仲得罪埋巴西幫呢個大靠山添,成隊波四分五裂,今晚喺意盃4強首回合造訪羅馬唔似有力反彈,寧捧「雌狼」2.35倍主W(開賽時間:周三凌晨2:45)
據意大利媒體《數碼體育》爆料,國米喺歐聯畀史浩克踢出局之後,教練李安納度埋怨陣中嘅巴西幫交行貨,上場輸畀帕爾馬場聯賽仲將馬爾干同莫達剔除出正選行列。要知道巴西球員喺國米勢力龐大,今次李安納度膽敢同班同胞搞對抗,嚟緊仲邊會有好日子過吖?
話就話意盃係國米今季嘅終極目標,但《天空體育》指無論「藍黑兵團」捧唔捧到盃都好,老闆莫拉堤已經落咗柯打要李安納度執包袱,就連總經理個位都冇得做,亨格比利就唔信呢位少帥仲有心機教嘞!
主隊羅馬嘅近況一般,但「王子」托迪就弗到爆,近5仗喪入7球,加上「雌狼」上屆喺奧林匹高球場畀國米砌低而失落意盃錦標,今鋪實報仇咁報,對住近5仗輸足4場兼陣營四分五裂嘅國米當然值得秤先。
意盃賽制
4強採主客兩回合制,今輪為首回合賽事,若兩回合總比數賽和,以作客入球較多一方為勝,若作客入球數相同,則在次回合90分鐘後加時30分鐘,若加時入球數字相同,則作客球隊獲勝,若加時無入球,則互射12碼決勝。