周三凌晨英超獨腳戲,紐卡素主場對曼聯。曼聯剛於英足盃四強出局,對紅魔鬼爭奪聯賽冠軍可謂百利而無一害,除令球員知恥近乎勇,亦可增強佢哋爭聯賽決心,對住降班壓力唔大嘅「私房菜」紐卡素,有朗尼復出嘅曼聯可贏番場振奮士氣,捧紅魔客勝! (有線301及201台周三凌晨2時45分直播)
對賽往績贏條街
曼聯剛於英足盃四強曼徹斯特市打吡不敵曼城出局,但卻無損球隊士氣,畢竟領隊費格遜講明最大目標係聯賽同歐聯錦標,正所謂少少苦楚等於激勵,從投注角度嚟講,上場失利只會令今場曼聯W更加值博,事關曼聯嚟緊賽程唔易應付,五月初要先後對阿仙奴同車路士,費爵爺賽前罕有地話今仗志在必得,睇得出佢真係好有決心!
事實上,曼聯往績食住紐卡素,近七次聯賽作客取得六勝一和,而近十七次交手曼聯亦未輸過,樂比仔有幸喺奧脫福球場觀看首循環曼聯大勝三比○賽事,當時紐卡素擁有安祖卡路爾呢位優秀射手,但全場依然處於劣勢,一句講晒冇得打,踢波嘅嘢就係格食格。
曼聯另一優勢就係停賽兩場嘅朗尼可復出,呢位「老虎仔」抖咗兩場,仲親眼睇住曼聯輸畀宿敵曼城,今仗落到場肯定有如猛虎出柙,隨時省多「喜鵲」幾粒,即使史高斯今場停賽都冇有怕。
紐卡素今仗續有隊長路蘭停賽,佢今季已取得十二個聯賽入球,除係球隊首席射手,亦係「喜鵲」精神領袖,紐卡素冇咗佢,攻力可謂大打折扣,因為前線已經有合共入咗十一球嘅艾美奧比及貝斯養傷,單靠尼爾蘭加同盧雲克蘭斯,想威脅曼聯大門真係幾難!