多蒙特今季真係殺得性起，去到呢刻仲係以七分領先優勢坐穩榜首，好多豪門球會都對佢哋一眾才華洋溢嘅球員有興趣，例如進攻中場馬里奧葛斯，我愛隊曼聯同巴塞都想要啊。不過對於我愛隊嚟講，不如爭佢哋嘅土耳其防中紐尼沙軒仲好啦，佢又後生又好波。
多蒙特今晚作客對住近況漸回勇兼要爭下屆歐洲賽資格嘅漢堡，我就覺得「蜜蜂仔」有機會失分，唔知係咪班地莊球員整季搏得太盡，定係知道自己領先次席球隊好多分，我經常喺直播見到佢哋近期表現不如季初，個別球員如哥斯基奧斯有少少跌Watt添！多蒙特早前接連對賀芬咸及緬恩斯失分，直至上周對漢諾威先贏番場。
爭玩歐洲賽戰意堅
你多蒙特想攞冠軍，人哋漢堡都想爭踢歐洲賽，佢哋落後第五位嘅緬恩斯只有四分，唔係冇得追。由副手坐正嘅奧伊寧上任後兩場一勝一和都叫唔錯，球會都有意開張長約畀佢，只要餘下賽程球隊有好表現，奧伊寧就考牌成功。
漢堡上場對賀芬咸有雲佬停賽下賽和，今次返主場有佢復出拍住腳風唔錯嘅柏歷，仲有老路縱橫嘅薛羅拔圖喺後面，人腳的確唔錯。漢堡近四季主場對多蒙特全勝，漢堡受讓，呢場「讓球主勝」有計。（有線61及64台周六晚9時30分直播）
漢堡 讓球主勝
