經過歐聯、歐霸一星期，最估佢唔到嘅球隊肯定係國際米蘭，有咩理由會喺聖西路輸２比５，未打次回合已經差唔多肯定出局。場波係睇到谷鬼氣，有史坦高域同迪亞高米列圖幫手捱到半場，但蘭奴捷亞又唔爭氣，送個烏龍球畀史浩克。
今晚國米再喺主場出擊對基爾禾希望能夠做場好戲啦，歐聯已打定輸數，聯賽榜只同ＡＣ相差五分，依家當然係搏命追番上去嘅時候。
主場成績意甲第一
國米雖然上輪不敵ＡＣ，但今季主場算企得穩陣，亦係廿支意甲球隊入面主場成績最好一隊，十五場賽事十一勝三和一負，今晚對手只係級數一般嘅基爾禾，國米近四次主場對基爾禾全勝，今晚我撐國米回魂。
