力爭57年來首個法甲冠軍嘅里爾,今晚作客褪色勁旅摩納哥,食住4連勝氣勢,兼有全法甲最強鋒線拍檔壓陣,要贏波自然話咁易,今場我捧1.95倍客勝。(now634及714台周日凌晨1:00直播)
里爾對上一次攞聯賽冠軍已經係1954年,之後嗰年佢哋贏多個法國盃冠軍,球迷等到今年先有望再嘗奪標滋味。佢哋目前喺聯賽榜踢咗29輪得58分,帶離次席馬賽4分,只要最後9輪生生性性就可以捧盃。睇番佢哋近4戰全勝,氣勢一流加上球員信心十足,今戰摩納哥有乜好驚?
摩納哥主場冇威力
再者,里爾前場雙箭頭蘇維同謝雲奴,今季聯賽夾埋入咗32球,冠絕法甲,其中已經入咗20粒嘅塞內加爾前鋒蘇維更要保住射手榜領先4球優勢,配合比利時超新星中場夏薩特,鋒力絕對畀到人信心。
老牌勁旅摩納哥已今非昔比,依家只係排喺尾3,為護級而戰。雖則話佢哋為避過自1970年首次降班嘅恥辱肯定搏命,但睇番佢哋近2次主場出戰都失分,1月先接手嘅新帥拿甘比亦非能扭轉局勢之人,今仗都係咪寄望太多。