亞冠盃分組賽戰火重燃，E組大阪飛腳作客濟州聯，日職受國內地震及海嘯災情影響暫時休戰，飛腳狀態唔算好，但大軍級數較高，加上近年作客韓職球隊戰績理想，大可以質補態，受讓下可捧「讓球客勝」！（now 671周二晚6時30分直播）
靠踢籌款賽操起狀態
日本大地震發生接近一個月，日職賽事全面暫停，大阪飛腳操練受到影響，上月中於亞冠盃作客ＦＣ天津輸一比二，發揮一般，今次再征韓國，唔少人擔心球隊狀態不足，大軍早前約戰神戶勝利船進行義賽為災民籌款，同時寓賽於操，就算冇十足狀態，預計起碼都有番七、八成水準。
經過一輪休整後，大阪飛腳只有中場橋本英郎長抖，遠藤保仁、加地亮及山口智等主力都有輕傷，但情況唔算嚴重，另中場明神智和傷愈復出，可減輕遠藤負擔，球隊人腳頗為完整。飛腳過去三年於亞冠盃分組賽作客水原藍翼、ＦＣ首爾及全南天龍等韓職球隊未輸過，對住濟州聯應該夠殺有餘。
濟州聯今季兼顧聯賽及亞冠盃雙線作戰，加上主將具滋哲離隊，整體表現明顯跌Watt，近兩周聯賽主場對ＦＣ江原及尚州尚武等弱旅踢落平平無奇。加上亞洲賽經驗不足，分組賽首戰主場對ＦＣ天津輸○比一，今次要讓波似乎高估咗佢哋，故捧「讓球客勝」有着數。
