歐聯之夜有場英冠獨腳戲做配菜,雷丁同普雷斯頓兩支狀態大勇嘅隊伍正面交鋒。雷丁近期贏到開巷,作客唔掂嘅普雷斯頓嘅連勝走勢睇怕要畫上句號,捧主勝。(開賽時間:周三凌晨3:00)足球彩票 足彩预测
雷丁呢排好消息特別多,最值得高興嘅係領隊麥戴莫獲續長約,佢老人家自09年上任後,一手一腳將雷丁由一支護級隊打造成今時今日嘅升班分子,絕對係居功至偉。而且養傷多時嘅右閘格芬、後衞馬菲米斯、利格活同前鋒路爾亨特已經復操,加上前鋒沙恩朗近6場聯賽入7球,有前又有後問你點頂?何況中場占美基比將會第100次為雷丁正選上陣,呢位馬里球員已經講到明,賽後會請主席馬捷斯基飲紅酒,今戰當然要以勝仗助興啦!
普雷斯頓後防缺主將
對家普雷斯頓聯賽3連勝,今場當然想乘勝追擊繼續搶分。之不過中堅辛列特加膝部韌帶受創好大機會缺陣,意味住年頭以150萬鎊過檔熱刺、最近以外借身份加盟嘅古馬奴會鎮守後防。呢位南非國腳嚟咗冇耐,默契唔夠隨時成為後防計時炸彈,捧雷丁W最正路。