歐聯八強首回合，衞冕球隊國際米蘭主場對史浩克04。好多人都話國際米蘭歐聯八強抽好籤，遇到今季大退步球隊史浩克04。事實上國米近季對住德甲球隊非常有計，加上史浩克喺德甲表現確實欠佳，作客成績尤其差劣。預計國米可以喺首回合取得領先優勢，「讓球主勝」值得留意。（有線62及202台周三凌晨2時45分直播）
國際米蘭剛啱喺上周末嘅米蘭打吡兼意甲榜首大戰以○比三不敵AC米蘭，衞冕聯賽錦標機會大減。因此「藍黑兵團」勢必會加多二錢肉緊，全力爭取歐聯衞冕。事實上，國際米蘭近兩季對住德甲球隊都有極佳演出，上屆決賽贏拜仁慕尼黑捧盃，今屆分組賽就喺主場大炒過雲達不來梅，去到十六強淘汰賽再遇拜仁，喺絕對劣勢下一樣奇迹反勝晉級。故國米可稱得上係「德甲剋星」，今次咁啱八強又抽中對史浩克04，相信國米可憑地利及豐富大賽經驗，喺首回合擊敗對手攞頭彩。
今仗國際米蘭有中堅盧斯奧停賽，故此蘭奴捷亞及哥度巴會繼續擔當正選。另外阿根廷射手迪亞高米列圖已經康復，剛啱米蘭打吡亦有落場，預計今場可與伊度奧合作攻堅。話晒「大米」都係上季歐聯最佳球員，點計都好過用彭迪夫。國際米蘭進攻線尚算完整，今場演出應唔會令球迷失望。
04作客戰績差
至於史浩克04方面，歷史上兩度作客國際米蘭都落敗，加上今季德甲作客成績排倒數第三，睇數據都幾難對國米構成太大威脅。另外上星期五傳出中場古治及加雲洛域都會因傷缺陣，另一月加盟嘅丹尼路艾維拿及安蘭又唔符合歐聯上陣資格，令史浩克喺排陣遇上一定困難，加上呢隊波擅攻不擅守，今日去到聖西路照樣擺出大無畏嘅攻擊型陣式，絕對啱晒擅打穩守反擊嘅國米嘴形，因此史浩克今仗即使有受讓之利，相信仍然唔會有運行。
