咁多觀眾睇住，點衰得呀？FSV法蘭克福今晚喺德乙主場對波琴，「讓球主勝」有得諗。雖然FSV法蘭克福近況差到暈，但呢場係佢哋今季主場首次有電視直播嘅賽事，教練保爾辛講明唔衰得要求球員贏波，對家波琴嘅射手鄭大世腳風麻麻，3分未必穩袋o架！（開賽時間：周二凌晨2:15）
波琴鄭大世勁跌Watt
FSV法蘭克福冇份爭升班，降班又未輪到佢哋，自然踢得比較Hea，近9場聯賽得2和7負可以理解。不過咁，到底FSV法蘭克福係咪真係冇得翻身？應該唔係喎，至少射手摩達斯今季有15個聯賽入球，充滿戰鬥力，後衞加列高又傷愈復出，前後都有，只要佢哋的起心肝踢好波，絕對有權搶分省招牌。
賽前FSV法蘭克福教練保爾辛就話，呢場係佢哋今季主場首次電視直播賽事，希望球員生性踢出翻身戰，即係話，佢哋唔會用風流波心態應付今場比賽，有分落袋絕對唔出奇。至於波琴，近14場聯賽有11勝3和的確好醒，弊在射手鄭大世踢完亞洲盃後狀態急插，上場對科特布斯得兩次射門，未必幫到波琴開W喎。
