季尾波最講鬥志，身陷降班漩渦嘅艾美利亞，近期密密加操谷起狀態，會方仲搞波飛大酬賓吸引Fans入場打氣，上下一心爭護級，淨係份鬥心同士氣都值得捧場啦！更何況佢哋近期主場表現硬淨，今晚西甲獨腳戲要砌低畢爾包唔係冇可能，平手盤一於捧艾美利亞。（now632及660台周二凌晨3:00直播）
近3季都以中游排名衝線嘅艾美利亞，今季演出大跌Watt，會方喺季中搵嚟奧達拉掌舵之後，戰績雖然冇乜顯著改善，但唔少球員包括副隊長艾卡錫迪在內都話陣營氣氛好咗，證明奧達拉係有啲計。
呢位少帥近期勒令球員喺傍晚加多一課操練，務求谷起狀態，賽前有消息指中場菲侯利同鋒將卡勞烏捷都已經傷愈，相信奧達拉可以派強陣應戰。另據西班牙《馬卡報》所講，自踏入2011年後，艾美利亞會長阿方素加西亞就宣布推出波飛減價優惠兼且送汽水，擺明想刺激入座率獲得更多Fans入場支持。
畢爾包作客發軟蹄
對家畢爾包仲要爭來屆歐洲賽入場券，今戰當然唔可以掉以輕心。之不過呢支巴斯克球隊作客成績極曳，今季14戰只係贏得3場咁大把，一對守將艾達奧斯奧及烏斯達列斯又因傷上陣成疑，艾美利亞護級心切加上近6仗西甲主場保持不敗，絕對有望贏波搶救命3分。
‧近6戰西甲主場保持不敗，錄得2勝4和。
‧連續24場聯賽保唔住清白之身。
畢爾包半場旺和
‧近3場西甲全開半場和。
‧今季西甲作客14戰僅得3勝。
