今晚英冠獨腳戲由兩支實力懸殊嘅球隊上演，「一哥」昆士柏流浪喺主場迎戰排尾3嘅錫菲聯，昆士柏為鞏固榜首位置，戰意毋庸置疑，今仗面對魚腩睇怕實食冇黐牙，熱捧1.4倍主W！（now638台周二凌晨2:45直播）
昆士柏流浪上場作客擊敗唐卡士打後取得2連勝，繼續喺英冠領放，領先次席嘅諾域治6分，由於聯賽仲有8輪未踢，所以領隊禾諾克亦未敢放鬆，強調至少要攞多10分先叫做穩住來季英超資格，預料今晚對住弱旅必全力搶分，以免日後夜長夢多。更重要係，昆士柏今季主場素有保證，近8場取得6勝2和不敗佳績，同「作客蟲」錫菲聯形成強烈對比。
另邊廂嘅錫菲聯上仗擊敗列斯聯後，距離護級安全區仲有7分，雖然主場錄得2連勝，但每逢作客就好似唔識踢波咁，近10戰竟告9負1和，仲要每場平均失2.3球，加上中場李爾威廉臣停賽，要喺榜首球隊身上攞到分數相信難過登天。
