聽朝南美自由盃有場獨腳戲，由彭拿路喺H組主場大戰葛度爾古斯。彭拿路暫時僅以1分落後畀對手，為出線，地頭出擊當然不容有失，何況佢哋後防有「惡漢」把守，相反葛度爾古斯近排惡戰頻頻，差唔多去到強弩之末，主勝有1.9倍抵玩！（開賽時間：周五早上8:15）
彭拿路暫時喺H組排第3，但落後榜首葛度爾古斯只有1分，今場贏波隨時升榜首，戰意唔會差得去邊。雖然彭拿路上輪分組賽作客大敗畀利加大學0:5，但利大一向靠高原主場搵食，輸波絕對不足為據。
洛迪古斯打人唔使罰
事實上，彭拿路喺今屆自由盃整體表現唔錯，年輕中場馬特斯米亞狀態大勇，彭拿路目前自由盃4個入波，有3球都係靠佢助攻，前史浩克04左閘達里奧洛迪古斯近排更人氣急升，佢早前喺主場對利大一仗中，竟然趁對方前鋒跌底後，重擊對方祠堂，事後竟然冇被秋後算帳，對方前鋒唔驚就有鬼。
今屆首次參加自由盃嘅葛度爾古斯，表現令人驚喜，但近排賽程密到爆，已先後連和2場，聽朝踢近14日內第4場賽事，恐怕有心無力，畢竟王牌左翼艾利爾洛查士啱啱踢「太公波」受傷要抖2周，加上葛度爾古斯喺今屆賽事唯一敗仗，就係主場輸畀彭拿路1:3，聽朝想搶分唔係咁易！
