打機同一道理，呢樣武器唔掂，就要換第二樣武器試吓，普丹迪聽朝喺巴西盃第2圈主場對明尼路，唔似頂得住，因為明尼路教練杜利華近排發晒火，勁不滿球員表現，賽前佢話到明，今場會換前鋒博反彈，信佢一於要1.88倍客W。（開賽時間：周五早上7:00）
換前鋒強攻普丹迪
普丹迪上一圈主場以2:0淘汰伊拉迪後，近7場州聯賽得1勝3和3負完全唔掂，最慘係近3次對賽得1和2負，1球都入唔到，當中上季為佢哋攻入10個巴甲入球嘅射手韋斯利巴保沙，仲要借用期滿返咗明尼路，家陣普丹迪前線冇個靠得住，正式畀人恰到上心口都唔識反抗。
事實上，明尼路教練杜利華都明知對方後防唔掂，所以準備將新加盟嘅祖比臣李安度打入冷宮，安排麥諾艾維斯代替佢打正選，夥拍列卡度般奴進行強攻，既然杜利華嬲到出面，相信球員都唔敢再揸流攤，特別係明尼路近5場得2勝2和1負，再唔出力，杜利華殺人都似，韋斯利巴保沙因傷唔能夠倒戈，中場李察拉遜停賽都唔怕。
巴西盃賽制
採主客兩回合淘汰制，今輪為第2圈賽事。在第1及第2圈，首回合若作客球隊淨勝主隊2球或以上便直接晉級，不用踢次回合。若兩回合總比數賽和以作客入球較多者為勝，若作客入球數相同，則在次回合90分鐘後互射12碼。
