英格兰刚啱喺欧国杯外围赛砌低威尔斯,433阵式获一致好评,今晚重返温布莱友赛非洲队伍加纳,领队卡比路赛前虽然放走5位主力球星,仲话会大变阵试人添,但一众副选兵为博上位取悦卡比路,要砌低加纳唔难,1.55倍主W趁热食。(now671台及广东体育周三凌晨3:00直播)
一向钟意同英超列强教头搞好关系嘅卡比路,前晚宣布放走下月初要出战欧联嘅5位球员,包括队长泰利、后卫艾殊利高尔、戴臣、中场林柏特同前锋朗尼,并留低对威尔斯场波冇披甲嘅迪科尔、高治同艾朗连侬3位热刺球员,相信呢个擦鞋决定肯定会令安察洛堤、夏利列纳同费格逊几个会相当满意同高兴。
巴尼斯艾朗连侬担正
毕竟今场波只系友谊赛,卡比路都唔想用到班球星太尽,佢老人家寻日就话会大执位,正选阵容极有可能面目全非,预料上仗冇落场嘅巴尼斯、艾朗连侬同迪科尔等会悉数担正,马菲查维斯将作处子登场,至于巴利就会担任队长一职。
艾辛到场帮加纳打气
对手加纳今仗有前队长艾比亚担任特别嘉宾,接受加纳足总会长尼耶达尔嘉许,作为表扬呢位中场过去对国家足球嘅贡献;至于暂时退出国家队嘅艾辛亦会到场为同胞打气。
查实加纳今次嘅人脚一啲都唔曳,中前场嘅蒙达利、基恩同阿休都系极具质素嘅猛人,但考虑到奇云保定因伤冇入选,守将彭素尔同文沙都比较粗枝大叶,中后场人脚始终难以予人信心。主队英格兰试阵还试阵,一众副选兵为博出位取悦卡比路依然要搏命,要赢加纳照计唔难。