无敌是最寂寞!西班牙称霸世杯后,领导球坛嘅雄心依然咁旺盛。卫冕欧洲国家杯嘅佢哋,依家喺外围赛I组4战全胜排榜首,实力超班,今晚作客立陶宛,虽然主队个场烂到唔系人踢,欧洲足协甚至一度考虑延期比赛,不过,西班牙班精英多到分开两队都出唔晒,个个要争正选必搏,1.73倍“让球客胜”都坐定粒六呀!(有线61、64周三凌晨2:45直播)
其实捧走南非世杯嗰班西班牙主力好后生,以佢哋表现加上不断有新星涌现,睇怕国际球坛嚟紧呢几年都系西班牙天下!佢哋上场对捷克虽然先失一球,但最后都照赢到,前锋韦拿仲打破埋鲁尔嘅入球纪录,成为西班牙史上头号射手,中场拍档沙维又达到第100次为国家队上阵嘅里程碑,依家西班牙士气如虹,简直遇神杀神!
韦拿创纪录士气爆灯
“世界最强”依家喺外围赛抛开晒其他对手,但会唔会因此放软手脚?小弟就唔系咁睇!虽然法比加斯同佩奥尔等主力有伤踢唔到,但领队迪保斯基手上实在太多好球员,连费兰度托利斯都要做后备,洛兰迪、大卫施华呢啲球星都无得踢,就知竞争有几激烈,有正选踢嗰班仲唔搏晒命入波咩!
主队立陶宛其实唔算“鱼腩”,同组嘅捷克同苏格兰都差唔多level,但佢哋拍落西班牙度就梗系差几班!比较多人识嘅前锋丹尼利域斯,都只系踢紧意乙嘅利禾奴就知呢班波有几多斤两啦!
立陶宛防守硬净
‧丹尼利域斯入19球系立陶宛史上头号杀手。
‧今届3场分组赛有2场保持不失。
西班牙场场有失波
‧韦拿刚以46个入球成为西班牙史上首席射手。
‧近3场分组赛每场至少失1球。