喺欧国杯外围赛大炒完哈萨克嘅德国,今晚移师去慕逊加柏主场同澳洲拍跳。虽则话日耳曼兵团有3大主力获准免役,但系两大新星晓姆斯同舒贺尔尼想喺主帅勒夫面前博表现下,要大炒青黄不接嘅澳洲根本话咁易,1.83倍“让球主胜”咪走鸡呀!(无线翡翠台周三凌晨2:45直播)
澳洲青黄不接冇卡希尔
德国旧年世杯分组赛首战就曾狂数澳洲4蛋,今次两军再碰头,力奇真系睇唔出澳洲有乜报仇本钱。领队勒夫对队波实力信心十足,赛前批准队长拿姆、中场奥斯尔同基迪拉提早离队抖抖,但2个今季喺德甲光芒四射嘅前锋舒贺尔尼同晓姆斯都会获得担正机会,加埋会以队长身份披甲嘅“小猪”舒韦恩史迪加,仲有追赶紧名宿梅拿入球纪录嘅高路斯,使乜惊佢哋赢得少吖?
今年1月喺亚洲杯夺得亚军嘅澳洲,嚟到同欧洲劲旅较量难免落入下风。最惨系球队近年出现青黄不接,由于主力卡希尔因伤缺阵,仲要靠基维尔、艾马顿、尼尔同舒华沙4大老天王支撑。德国籍领队奥锡克话明今仗会畀机会2个新星考验实力,但所谓嘅新星咪只系澳职射手罗比古斯同德乙哈化柏林箭头路卡维斯亚,都系实力有限之辈,作客出击咪盏做炮灰啰!