今晚英甲獨腳戲，哈特斯菲爾德主場恭候諾士郡。前列分子哈特斯菲爾德自踏入2011年後保持不敗，為爭取直接升班資格，餘下賽事不容有失，今晚對住鋒力薄弱兼士氣低沉嘅諾士郡，3分志在必得，捧1.82倍主勝。（開賽時間：周日晚11:00）
諾士郡作客腳軟士氣差
今季英甲前列位置咬得好緊，除咗「一哥」白禮頓晨早跑出之外，2至7位球隊仍有機會爭做「二哥」，所以哈特斯菲爾德上仗同史雲頓互交白卷，領隊李爾奇勒一直耿耿於懷。亨格比利睇番賽後報告，哈特斯菲爾德上仗兩次中楣中柱，失分都幾唔抵，賽前佢哋借入雷丁後衞桑摩利臣至季尾，後防冇牽掛照計可以安心進攻搶分。
對手諾士郡仲未脫離降班漩渦，近6仗入得1球咁大把，鋒力弱得可憐。據講唔少Fans對球隊戰績好不滿，領隊恩斯更加喺日前公開道歉，陣營士氣都幾差，而且今季聯賽作客17戰有14場失分，造訪哈特斯菲爾德想有運行都幾難！
