足球王國巴西今晚喺倫敦阿聯酋航空球場同蘇格蘭拍跳，可以話係新兵大考驗。兩軍今仗都起用唔少新人，不過森巴兵團派出嘅係包括尼馬、大衞雷斯同李安度達美奧等超新星，質素贏蘇格蘭二線兵成條街，1.8倍巴西「讓球客勝」要捧！（開賽時間：周日晚9:00）
講鬥心，要到9月先再有歐國盃外圍賽踢嘅蘇格蘭，相比起急住為夏天美洲盃練兵嘅巴西，已經肯定差一截，更何況巴西之前2場熱身賽不敵阿根廷同法國，為免錄得3年來最差走勢，今仗點會唔搏命？巴西領隊文奴文尼斯賽前話到明，專登唔揀細哨同卡卡等巨星，係想睇吓班新人有幾多料，「新比利」尼馬、近期踢到曉飛嘅大衞雷斯、拉美利斯同盧卡斯等，肯定想把握機會騷哥利。
馬些路傷肋骨唔踢得
係，巴西雖然有2名箭頭柏圖同尼爾馬因傷退隊，但補入嘅21歲小將李安度達美奧係射得之人，配合山度士前鋒尼馬，鋒力依然靠得住。防線方面，左閘馬些路尋日操練被連拿度奧古士圖撞傷肋骨，搞到呼吸困難，今仗未必踢得，不過森巴兵人才濟濟，頂上嘅安德里山度士亦係攻守兼備嘅新人王，人腳依然強勁。
蘇格蘭靠英甲前鋒食胡
上星期先去西班牙集訓嘅蘇格蘭，似遊埠多過練波，據聞主帥利雲驚佢哋玩出火，曾私下落禁酒令。加上前鋒賴史密夫、左閘巴士利同門將伊恩端納因傷退隊，利雲焗住用件英甲彼德堡射手馬卡爾史密夫頂上，隻翼辛迪加斯又係嚟自英冠列斯聯，布力般19歲中堅漢利踢得7場英超又話入選，咁嘅陣容，搵你要啦！
蘇格蘭旺開大
‧近3仗主場得2勝1負，總入球均在3球或以上。
‧對上一次與巴西交手為98年世盃，負1:2。
巴西對賽佔優
‧歷來9次交手得7勝2和。
‧2連敗均輸0:1，均開半和全負。
