國際賽舉行期間，各大主要聯賽都要讓路，好彩仲有阿根廷聯賽照踢，阿King今次集中推介呢個南美賽事，堤格雷主場對葛度爾古斯，主勝可以作為重心。堤格雷雖然排名同近況都不及對手，但卻要讓波，似乎莊家收到風，客軍會有所保留，皆因葛度爾古斯周中將出戰自由盃出線關鍵戰役，今場戰意成疑，阿King信盤口捧主隊。 （周一凌晨1時開賽）
葛度爾古斯留力自由盃
葛度爾古斯喺聯賽連盃賽，近四仗取得三勝一和，狀態比對手為佳，但竟然受讓，的確有蠱惑，相信係同佢哋將於周中自由盃作客硬撼彭拿路有關。葛軍所在小組競爭激烈，每場都係「六分波」，球隊短期內，或會將精力放在自由盃，搏埋最後兩場分組賽，取得出線資格後，再爭聯賽。而且葛度爾古斯頻頻一周雙賽，球員逐漸出現疲態，今場作客更加信唔過。
堤格雷近兩場皆敗，但上仗表現唔錯，一度取得領先優勢，但因為中場加馬利尼被逐，令形勢逆轉而全失三分，球隊吸取教訓後，今仗應唔會再鹵莽行事。值得留意係堤格雷一直剋住葛度爾古斯，雙方近五次交手，堤格雷贏咗四次，其中兩次主場出擊都淨贏葛軍兩球，有往績支持，主勝值博。
班菲特高隆有力贏盤
另一場阿甲，獨立隊近期同樣經常分身應付自由盃，令球員疲於奔命，今仗有主場之利，亦讓唔起當勇嘅班菲特，要客軍下盤。高隆主場對小保加，小保加今季表現非常差，近四仗更未能取得入球，平手盤要高隆。
