唔知点解一提起丹麦，我就只会谂起曲奇饼，可能系我太为食的关系。既然讲开丹麦，不如就讲今晚呢场欧洲国家杯H组外围赛挪威对丹麦啦。
先睇H组出线形势，挪威暂时占尽优势，其他国家队好似都唔系佢对手咁，塞浦路斯同冰岛更似陪太子读书。挪威依家系世界排名第十一位，近期嘅威水史，当然都要数主场赢葡萄牙一比○嗰一场。挪威近十场主场赛事仲犀利，七胜一和两负，可见挪威主场威力几强劲。
个“细”食住丹麦
至于丹麦方面，虽然佢哋喺小组三战两胜一负，但两场胜仗都系主场赢波，作客真系几弱，曾经作客不敌葡萄牙一比三，今场仲冇埋宾特拿添，点样争取入球？挪威分组赛表现真系令人眼前一亮，虽然依家仍然靠卡维，但效力汉诺威嘅艾度拿奥尔真系几射得，赢冰岛就系靠佢射入奠胜球。
再睇埋双方得失球数字，今晚呢两队各自喺过往三场外围赛得球同失球加埋都系得七球，所以，今场我除咗睇好挪威外，入球细都值得一试架。
