今晚欧洲国家杯外围赛,G组上演英伦三岛打吡战,威尔斯主场对英格兰。英格兰作为英伦一哥,当然唔想衰喺细佬手上,加上威尔斯人气球星加里夫巴利又因伤缺阵,大大削弱攻力。两队好熟路,就好似英超对英冠咁,一于捧英格兰W及大盘!(广东体育周六晚11时直播)
半个主场 谢四缺阵更佳
英格兰同威尔斯对上一次碰头系○六年世界杯外围赛,英格兰主客都击败对手,其实两地属于同一国家,英格兰适应上冇乜困难,间接令威尔斯卡迪夫千禧球场威力大减,英军作客赔率好分啲,计乐比仔话值博率仲高。
虽然英格兰今次有里奥费迪南、谢拉特缺阵,但英军人才济济,真系冇话冇咗边个唔得,尤其系泰利重当队长之后,球队士气有增无减,毕竟谢拉特、里奥好波就好波,但领袖风范同感染力远不及泰利,而谢拉特受伤更解决咗“双特”齐出冇料到问题,无论领队卡比路出巴利抑或韦舒亚拍林柏特,效果相信都会好过出“双特”。
威尔斯一直不乏球星,远有修荷路、晓士、杰斯、鲁殊同桑达斯,近年亦有加里夫巴利、比拿美等,但点解仲系同大赛冇缘,世界排名更低至一百一十六位?主要原因系佢哋冇一个好统帅,令球队欠缺队形同风格,纪律亦相当散漫,现任领队史必喺球员时代受到尊重,但执教经验尚浅,根本带唔起队波,威尔斯要打入大赛甚至提升排名,仲有一段好漫长嘅路要行。
威军好攻 近两场失7粒
最简单一样嘢,作为一支弱队,威尔斯应该加强防守,就算唔赢都守和你先,但威尔斯却乐于踢性感足球,结果两头唔到岸,好似近两场热身赛咁,威尔斯对住欧洲二线球队瑞士、爱尔兰都可以合共失咗七球,对住英格兰班高质射手,真系随时输多几粒。