热身赛2场变1场，自然要搏命砌到尽！南韩今晚喺首尔对洪都拉斯，一于捧“让球主胜”，事关赵广来对呢场波志在必得，宁愿同洪明甫反面都要用佢心目中嘅最强阵出击，配合大批外流球员归队，有望省招牌。（有线36周五晚7:00直播）
由于地震黑山取消去日本，连带作客南韩都甩底。不过南韩喺队长朴智星宣布退出国家队后，踢咗两场波，分别系亚洲杯季军战赢乌兹别克3:2，热身赛作客摸和土耳其0:0，证明冇咗朴智星都唔会崩溃，今次集中搏一场捧得过。
洪都拉斯残阵战意成疑
虽然南韩今场又有中场具滋哲同右闸车斗里因为唔同理由缺阵，但赵广来唔理南韩奥运队要对中国奥运队，坚持召入佢想用嘅所有新星，加上新队长朴主永、翼锋李青龙、中场寄诚庸同中坚李正秀全部归队，唔赢洪都拉斯点掂？
事实上，今场洪都拉斯嘅阵容明显唔对路，甚至可以话让半臂，最有名气嘅国际米兰前锋苏亚素、热刺中场柏拉西奥斯同巴里中场艾格艾华利斯都冇份踢。
而且为迁就开咧冇耐嘅美职联，今次大军名单上，完全冇效力美职联嘅球员出现，得番韦根中场亨特利汤马士同后卫美罗费古罗亚孭飞，睇得出佢哋根本唔志在呢场波嘅胜负，就算近6场有4胜2和都信唔过。
