世杯王者西班牙听朝喺主场迎战捷克,届时中场沙维(圆图)会获得佢第100顶国家队喼帽,之前有传呢位31岁嘅巴塞大将踢埋今仗就退出国家队,搞到球迷鬼死咁Down。好彩,寻日沙维就出嚟澄清,话明会继续为国效命!
西班牙史上第4人
作为西班牙捧走欧国杯同世杯嘅功臣,沙维喺国家队可谓举足轻重,佢寻日接受西班牙《阿斯报》访问,仲专登粉碎有关退出国家队嘅传闻:“对于达到为国上阵100次嘅里程碑,我真系好骄傲,不过我相信我会获得更多‘喼帽’,足球可以团结整个国家,我好钟意。”
除咗凼粉丝,佢仲凼埋屋企人开心:“每逢我遇到挫折,我嘅亲人都会喺我身边,我真系好好彩。”过埋听日,沙维就会成为西班牙史上第4位上阵过百场嘅球员,家阵佢只系比前锋鲁尔踢少2场,嚟紧好有机会超越鲁尔做“3哥”。