“大头”返嚟啦！今晚中国喺武汉主场迎战新西兰，李玮峰等多名“问题球员”终于解禁回归，相信一定会加多两钱肉紧，迎战阵容不整嘅新西兰，绝对有力开出1.9倍主W！(开赛时间：周五晚7:35)
新西兰伤兵成箩
为考察球员，中国今次征召咗两班人马，一支今晚主场对新西兰，另一支就喺听日作客哥斯达黎加。今晚主场对新西兰嘅会系国家一队，由于国足领导层啱啱出现大地震，所有“问题球员”全部解禁，当中“大头”李玮峰阔别33个月终于重返国家队，崔鹏同冯仁亮亦再度入选。
虽然领队高洪波决定带中国二队出征哥斯达黎加，今晚对新西兰委派傅博指挥，但其实高帅一早已有计划，钦点天津王牌于大宝相隔97日再担任国足正前锋，再加上蒿俊闵同黄博文两名海外球星，就算杜威今晚真系因伤唔出得，冇得同“大头”组成“威峰”组合，朱枫仍认为国足一队有力奏捷。
况且新西兰赛前伤兵一个接一个，布力般流浪中坚赖恩尼尔逊啱啱亦退队，前日去到武汉只得17人随队，最后因为唔够人被迫取消练波，成队波得番前锋史美斯孭飞，今晚睇怕都系捱打。
