夢想成真！講緊嘅係英甲嘅奧咸今晚喺英格蘭足總盃第3圈作客利物浦，陣中有唔少球員都係「紅軍躉」，難得可以嚟到晏菲路球場作賽，當然開心都嚟唔切啦！之不過「紅軍」今季盃賽成績驕人，奧咸想偷雞都唔容易，主隊開到「-2」，小妹都照捧1.92倍「讓主」。（開賽時間：周六凌晨4:00）
大家可能覺得奧咸只係一隊長期身處次級聯賽嘅小角色，其實佢哋曾經參與英超成立後嘅頭兩季比賽，可惜之後就降班，自此喺英冠與英甲之間浮沉，所以今次能夠造訪晏菲路，絕對難能可貴。
奧咸為隆重其事，更喺官網為呢場「大戰」倒數，又請嚟隊中「紅軍躉」中堅戴亞蒙同中場韋素奴斯基分享感受，佢哋不約而同咁話好期待一邊聽住利物浦球迷唱《You'll Never Walk Alone》、一邊踏入球場嘅瞬間，但係同時亦話唔會輕易認輸，希望可以好似上屆嘅諾咸頓咁爆冷淘汰利物浦，相當有膽識！
古積特加新仔仍然超班
利物浦雖然冇力喺英超爭霸，不過已經唔係上年淪落到要護級嘅頹軍，面對喺英甲中下游徘徊嘅奧咸，仍然有十足把握。「紅軍」今季唔止主場不敗，喺盃賽表現尤其出眾，至今4場聯賽盃全勝，連有主場之利嘅車路士亦慘遭屠殺！
由於賽程緊密，小妹預計利物浦「國王」杜格利殊今仗會派遣馬田基利、舒維爾、高亞迪斯等嶄露頭角嘅小將擔大旗，再配合古積特、麥斯洛迪古斯等高質後備兵，質素仍比奧咸一眾球員高，大勝晉級應該毫無懸念。
橫數千軍
紅軍盃賽全勝
‧今季10次主場不敗得4勝6和，當中7次開細。
‧盃賽全勝，每場最少入2球。
奧咸作客旺細
‧近10場作客得2勝2負6和，同樣為7次開細。
‧最近6戰作客全部和波。
英格蘭足總盃賽制
今輪為第3圈， 若法定時間內打成平手，需擇日重賽
