國際米蘭今季成績唔好,普遍意媒都睇死教練雲尼亞里撈唔得耐,預計會方明年夏天就會物色新帥掌舵。但勢估唔到「藍黑兵團」會長莫拉堤咁大想頭,竟然想撬巴塞隆拿揸弗人哥迪奧拿過檔,夥拍巴治奧組織「夢幻教練組」!
布雷西亞踢過波Friend底
巴治奧同哥迪奧拿曾經喺布雷西亞並肩作戰,二人可以話Friend過打Band,對於聯手執教國米嘅傳聞,呢位昔日金童向《國米新聞網》表示:「同佢(哥迪奧拿)齊齊教波梗係好啦,世事嘅嘢話唔埋,我覺得有機會囉。」
早排考到教練牌嘅巴治奧,同傳媒講除咗母會維琴察之外,國米喺佢心目中嘅地位同樣無法取替,若果莫拉堤開到聲,佢實唔會托手o架喎!至於莫拉堤嗒哥迪奧拿糖已經唔係新聞,呢位巴塞主帥周不時都會去意國度假,仲多次傳出佢同國米高層密會添,話唔埋哥帥喺西班牙贏到悶,想轉吓環境接受新挑戰呢,「夢幻教練組」呢個Idea唔係冇機o架