英足盃第二圈重賽,甲組伊奧維主場鬥非聯賽費列活特,取主W!伊奧維級數高,上次造訪費軍曾領先兩粒,如非多次浪費入球良機,早已贏波過關。伊奧維今番主力幾乎悉數披甲,費列活特失主場如冇殼烏龜,難也文也武!(now 671及672周三凌晨3時30分直播)
伊奧維現排英甲十九位,但近五戰三勝二和,前鋒愛德華厄遜同安迪威廉斯腳風都好順,今仗會出場落力爭勝。事實上,上次伊軍作客費列活特,打落有超班之勢,一度領先兩粒,只因輕敵先臨尾香被追平。少帥史基維頓話會把握另一次機會,於主場解決對手。
費列活特作客腳軟
費列活特係英格蘭第五級球隊,比伊奧維低兩級。呢隻非聯賽球會於自己地頭或者好惡,上兩圈曾擊敗韋甘比同曼斯菲,但冇主場之利,戰鬥力肯定減半,今場2倍主W抵玩。