爆冷、爆冷呀！啱啱完咗嘅歐聯分組賽，的確令唔少朋友大跌眼鏡！曼城贏波出局你可能估得到，但曼聯輸波，要降格踢歐霸，就真係從無諗過。現實係殘酷嘅，班「反曼迷」亦趁機即刻出嚟抽水，睇嚟一班紅魔粉絲呢個禮拜嘅心情都係持續灰暗。
36場不敗斷纜痛定思痛
其實班霸輸波又點算出奇？就好似澳職長勝將軍布里斯班獅吼咁，成功打破咗國家體育會最長不敗紀錄三十六場之後，個「不敗」終於喺上場中止，作客悉尼輸○比二。
輸波原因都好簡單：踢得差！全場埋門得五次，中框射門更只得兩次咁大把，呢個數字比起之前鬥珀斯光輝同埋贏紐卡素噴射機，足足少咗十次有多。咁冇射門當然無入球啦！痛過之後，今日晏晝獅吼會主場出擊對墨爾本雄心，呢場好關鍵，如果獅吼吸取到輸波教訓及時回勇，將會變得更強。
墨爾本雄心雖然近況不俗，但始終作客唔係佢哋強項，今季只係贏過出名主場少球迷支持嘅黃金海岸聯，故此獅吼嘅「讓球主勝」仍然值得支持，希望呢支澳職班霸唔會再刺激班長捧熱門嘅球迷啦！（有線64及204台周五下午５時直播）
