今晚重心放在國際賽南非主場對科特迪瓦,呢場賽事係曼德拉盃,但咪以為主人家一定搏命,事關南非上年就試過輸畀美國失盃,今次佢哋主場迎戰強陣出擊嘅科特迪瓦,實力差一皮唔夠砌,客W可作過關膽。(周六晚9時15分開賽)
科特迪瓦強陣見誠意
南非近年國際賽成績不振,球隊處於重建階段,主帥慕斯文尼為今次友賽科特迪瓦同下周二再鬥津巴布韋,就足足徵召咗廿八名球員,當中有廿個係効力本土球會嘅球員,實力未算最強。再者慕斯文尼話明會用盡所有人去踢呢兩場波,試陣味極濃,未必會全力爭盃。至於「象牙兵團」科特迪瓦就強陣得多,托尼兄弟、沙洛文卡勞同啱啱傷愈嘅杜奧巴都有入選,唔似玩玩吓,客W值得追捧。
另外兩場心水揀日乙賽事,京都不死鳥近五場贏晒全面回勇,預料今場擁主場之利下對東京綠茵可添食,平手盤捧不死鳥。至於鳥棲砂岩距離升班目標愈來愈近,今次作客FC愛媛唔會手軟,預計可以再下一城,捧客勝